19:33 Shoxjaxon Jo'raev_jonle ijro bu jonle ijro diganimas. | |
| Бу хонанданинг феъл-атворини тушуниш, у билан тил топишиш жуда қийин. Аммо у истаган мавзуда сўз очиб, унинг санъаткорлигини унутиб дўстона муносабатда бўлсангиз, ундан яхши суҳбатдошни тополмайсиз. Унинг ҳаётга, яшаш тарзига умуман ҳар бир нарсага нисбатан ўз принциплари бор. У бировлар учун яшашни эмас, ўзи учун ўзи истагандек яшашни маъқул кўради. Шоҳжаҳон Жўраев ҳақида гап кетганда "у отасининг эркатойи, у учун қўшиқ айтиш бир хархаша холос” деган гапларни эшитишга ўрганиб қолгандик. Аммо у билан суҳбат чоғида бундай гаплар умуман ноўринлигини англадик. — Бундан бир неча йил аввал сизни 8 март байрами муносабати билан бўлиб ўтган гала концертда кўрган эдим. Адашмасам, шундан буён концертларга чиқмадингиз. Феврал ойида бўлиб ўтиши кутилаётган концертингизга тайёргарликлар ишлари қандай кетяпти? Ҳар ҳолда илк яккахон концертингиз, устига- устак жонли ижрода... Ҳаяжон бордир? — Ишонасизми, йўқми мен саҳнага чиққанимда умуман хаяжонланмайман. Ўзимни бемалол тутиб, қўшиқ айтавераман. Баъзи пайтларда ҳар битта санъаткор хаяжонланиши керак, бўлмаса у санъаткор эмас, деган гаплар қулоғимизга чалинади (кулиб). Қачонки санъаткор ўзига ишонса, унда ҳеч қандай ғулғула ҳам, ҳаяжон ҳам бўлмайди. Беш минг кишилик стадионларга бориб концерт берамиз. Лекин ҳеч қачон хаяжонланмаганман. — Санъатдаги бугунги мавқеингиз учун икки кунлик концерт камлик қилмасмикан? Ахир ҳали танилишга улгурмай 4-5 кунлаб концерт бераётганлар ҳам йўқ эмас. — Мен бошқаларга ўхшаб ёлғондан одам тўплаб, кўр-кўрона концерт бермоқчи эмасман. — 10 кун концерт берсангиз, ана шу вақт мобайнида залнинг тўлишига ишонасизми? — (ўйланиб) Бу саволингизга "ҳа” ҳам деёлмайман, "йўқ” ҳам. Чунки яқинда Фарғона, Андижон, Наманган шаҳарларида 3-4 минг кишилик жойларда концерт бердик. Шукрки, залда бўш ўрин бўлмади. — Кўринишингиздан кибр сезилиб туради. Буни сизга кўп айтишган бўлса керак? — Очиғи, бу каби гапларга ўрганиб кетганман. Шунинг учун ҳам қисқагина қилиб шундай туғилган бўлсам, нима қилай, деб жавоб бериб қўя қоламан (кулиб). Бирор бир одам билан мулоқотга киришишдан аввал "ҳозир мен унга бориб салом берсам-у, у алик олмаса” деган фикр хаёлимдан ўтади. Мен томонга интилганларни эса доим очиқ чеҳра билан кутиб оламан. Агар кеккайиб муомала қилса, мен ҳам шунга яраша жавоб қайтараман. — Сиз билан тенгқур санъаткорларнинг кўпчилиги учрашиб, дийдорлашиб туришади. Аммо уларнинг даврасида сизни кўрмаймиз. — Бироз одамовилигим бор. Ҳатто энг яқин дўстларим билан ҳам базўр бир ойда бир марта кўришаман. Чунки кўпчилик бор жойга бориб, узоқ вақт ўтиришни ёқтирмайман. Кўпроқ ёлғизликни, ҳамма нарсани бир ўзим қилишни хуш кўраман. — Асакага кўп бориб турасизми? — Албатта. Ўзим Тошкентда туғилиб вояга етган бўлсам-да, юрагим ота юртиvга тортиб туради. Биласизми, у ерликларни нега ҳурмат қиламан... Санъаткорга чин дилдан мухлислик қилишади, биров билан дўст бўлишса жонини беришга ҳам тайёр. — Балки кўпилик сиздан манфаат истаб дўст бўлишишга интилгани сабаб, одамлар билан яқин бўла олмассиз? — Балки шундайдир (ўйланиб). Шу вақтгача ким билан дўст бўлиб, ким билан улфатчилик қилган бўлсам, ўша одам мен билан эмас, машҳур ҳофизнинг ўғли сифатида қарашган. Бундан эса безиб қолганман. Умуман, ҳозирги кунда ҳаётда ва жамиятда тутган ўрнинг, ким эканлигингни четга суриб, мазза қилиб суҳбатлашадиган одамлар камайиб кетган. Ҳатто бир неча йилдан буён кўришмаётган танишларим билан соғиниб кўришсак-да, агар гапларида сохталикни сезсам, кўнглим зада бўлади. — Гапларингиздан бир нарсани пайқагандек бўляпман. Машҳурликдан чарчар экансизда? — Йўқ. Мана шу гапни жуда ёмон кўраман. Санъаткор аслида ана шу машҳурликни истаб саҳнага чиққанидан кейин нима учун ундан чарчаши керак? Мен санъатга қадам қўйишдан аввал саҳнанинг чангини ютишга, халқнинг баъзида ширин, баъзида аччиқ гапини тўғри қабул қилишни бўйнимга олганман. — Бугун санъатга кириб келаётганларнинг кўпчилиги ё ном учун, ё нон топиш илинжида шу соҳага қўл уряпти. Сизда эса ҳар иккиси ҳам бор. Санъатга киришдан мақсад нима? — Мен бемалол бошқа ишни қилсам ҳам бўлаверарди. Лекин қўшиқ айтмасам, яшолмайман. — Шоҳжаҳон ва Зоҳиршоҳ Жўраевларни ўзига яраша тантиқ дейдиганлар ҳам топилади. Шундай вақтларда жаҳлингиз чиқса керак? — Йўқ, иложи борича аҳамият бермасликка ҳаракат қиламан. Тўғри, отам санъатга киришимизда катта ёрдам берганлар, ўқитдилар, студия очишимизда ёрдам бердилар. Аммо қаттиққўлликни ҳам унутгани йўқ. Ишонсангиз, машина олаётган вақтимда машинанинг ярим пулини тўлаб, қолганини ўзинг ишлаб топиб, тўлайсан деганлар. Ўз вақтида Тошкентнинг қоқ марказида туриб, қўй боққан, укам иккимиз бутун ҳовлининг ерини ағдарган вақтларимиз ҳам бўлган. Бугун буларнинг барчаси учун отамдан миннатдорман. — Сиз эришаётган ҳар бир ютуқнинг охири бориб отангизнинг номи билан боғланишига қандай қарайсиз? — Биринчидан шундай санъаткорнинг фарзанди бўлиш, ҳаётнинг менга берган унвони. Бироқ сизга ишонч билан шуни айтаманки, ҳеч қачон, ҳеч қаерда отамнинг номи билан иш юритмаганман. Авваллари бирор тўйга борсак ҳам кўрганлар "Ие, фалончи ҳофизнинг ўғли келибди” дерди. Бориб-бориб ўз исмимиз билан атайдиган бўлишди. Қайсидир маънода ҳар нарсага ўз меҳнатимиз билан эришаётганимизни исботладик. Отам ҳамиша бир нарсани уқтириб келганлар. "Биринчи чалинган қарсак – бу менга берилган қарсак, иккинчи қарсакни сен ўз меҳнатинг билан топасан” дердилар. Шукрки, бугун қўшиқларимни тинглайдиган мухлисларим бисёр. Ана шунисидан кўпроқ қувонаман. — Халқни сизга бўлган ишончини оқлай оляпсизми? — Ҳа. Буни юз фоиз ишонч билан айта оламан. Боиси, мен халқни алдаб концерт бераётганим йўқ. Мухлислар мендан жонли ижрони кутяптими —бажонидил. Уларнинг борлигини, менга бўлган меҳрини, тафтини сезиб турсам, менга шунинг ўзи кифоя. — Ҳозир қайси санъаткорга нега жонли ижрода куйламайсиз деган савол билан марожаат қилсак "халқ жонли ижрони тушунмайди, фонограмма билан жонлида куйлаётган хонандага нисбатан муносабат бир хил” деган жавобни эшитамиз. — (кулиб) Мухлисларнинг ўзи сендан жонли ижрони талаб қилиб турса-ю, сен ҳар хил баҳона-важ қидириб ўтирсанг. Буни ақлга сиғдириб бўлмайди. Ундан кўра айтолмаслигини тан олгани яхшироқ эмасми? Ҳар бир касб эгаси пулини ҳалоллаб топиши керак. Агар мен фонограммада айтиб пул топсам, билингки у ҳалол эмас. — Бизда санъаткорни жонли ижрода куйлашини талаб қилиш у ёқда турсин, ҳатто ўзи тинглагиси келаётган қўшиқни айтиб беришини сўрашнинг ўзи қийин. Чунки кўпчилик санъаткорларимиз тўйда тўй эгасининг таклифидан келиб чиқиб эмас, ўзлари истаган қўшиқларини куйлашади. — Биласизми, бунда мухлисларнинг хам айби бор, назаримда. Чунки ўзлари санъаткорларга шундай имконият яратиб беришган. Баъзи тўйларда хизмат қилаётганимизда одамлар ёнимга келиб "ака, мана бу ашулангизни қўйиб беринг” дейди. Мен икки соатдан бери жонимни жабборга бериб жонли ижрода куйласам-у, у одам келиб айтиб беринг дейишнинг ўрнига, қўйиб беринг деса... Қайси ашулани айтиб беришга келсак, мен қайси қўшиғимга талаб бўлса, ўшанисини айтиб кетавераман. Ва бу менга асло қийинчилик туғдирмайди. — Касбдошларингизнинг концерт дастурларида умуман кўрмаймиз? — (кулиб) Чунки кўпчилигининг ўғирлаб айтаётган қўшиқларини концертида эшитгандан кўра, қўшиқнинг асл талқинини уйимда эшитганим маъқул. Қайси санъаткор "зўр” дейдиган даражада иш қиляптики, мен уларнинг концертига борсам. Ҳатто томошабинга бўлган муносабатлари ҳам асабимга тегади. Тўғри, концертнинг қонун-қоидасига кўра залга қўриқчилар қўйилади, лекин ўз мухлисларининг олдига тушиб қўшиқ айтиш, икки оғиз ширин сўзини эшитишнинг нимасидан қўрқишади ҳайронман. Қўшиқчи шу халқнинг вакилими, демак халқнинг ичида бўлиши керак. — Тўйингизни нима учун матбуотдан сир тутдингиз? — Мен оиламни ҳаммадан қизғонаман. Қўшиқларимиз, клипларимиз орқали ТВда чиқиш қилаётганимизнинг ўзи кифоя. Тўйимнинг видеосини, суратларини сотувга чиқариб, ўзимни шу йўл билан реклама қилмоқчи эмасман. — Сизнинг концертингиз бошқа санъаткорнинг жонли ижродаги концерт дастурларидан нимаси билан фарқ қилади? — Биласизми, бугун жонли ижрода концерт бериш бизда сенсация даражасига етиб келди. Кимдир жонли ижрода концерт қўйса, одамлар дарров шов-шув қилади. Гап концертнинг жонли ижродалигида эмас, ўша ижронинг қандайлигида. Жонли ижрода ҳамма куйлаши мумкин. Лекин ҳамма ўз имкониятидан келиб чиққан ҳолда куйлайди. Эътибор берсангиз, матбуот ҳам кимнидир жонли ижрода концерт берганини мақтайди, аммо у қандай куйлагани ҳақида индамайди. Ўйлайманки, концертимда мухлислар жонли ижродан баҳраманд бўлиб, ҳордиқ чиқаришади. Қамариддин ШАЙХОВ суҳбатлашди манба : darakchi.uz | |
|
| |
| Всего комментариев: 0 | |
